Vinnsluferli

Klóþang í fjöru
Klóþang í fjöru

Vinnsluferlið i Þörungaverksmiðjunnar nýtir sér gott aðgengi að fersku hráefni úr Breiðafirði og mildrar þurrkunnaraðferðar með jarðvarma á Reykhólum. Aðstæður við Breiðafjörð eru einstakar þar sem fjörur eru stórar vegna grunnsævis, eyja og skerja og mikils munar á flóði og fjöru við harðar klettóttar strendur. Þang er sótt ofarlega í fjörur strandlengjunnar og við eyjar, hólma og sker. Þarinn er skorinn utar í dýpri sjó. Skilyrði fyrir vöxt sjávargróðurs er einstaklega góð. Til þurrkunar er notað loft sem er hitað með um 110°C heitu vatni úr borholum á Reykhólum.

Klóþangs (Ascophyllum nodosum) er aflað með þangslátturvélum. Hrossaþara er aflað með greiðu á sleða sem öflunarskipið Grettir dregur með botni. Greiðan virkar þannig að elstu stönglar þarans standast álagið og yngstu stönglarnir eru svo mjúkir að þeir sleppa í gegn. Þannig er aldrei sleginn allur sjávargróðurinn á hverjum bletti.

Hráefnið er þurrkað í Þörungaverksmiðjunni við jarðvarma og hitastig sem tryggir varðveislu virkra efna. Þurrkunaraðferðin er mild miðað við þangþurrkun við olíu og kolakatla eins og víðast er gert annars staðar. Of hátt hitastig gerir þörungamjölið dekkra og stundum brennur það við. Þurrktími getur verið breytilegur eftir veðri og tegund hráefnis, en er að öllu jöfnu um 2-3 klst. Eftir þurrkun eru plönturnar malaðar og mjölið siktað í nokkrar kornastærðir. Því er ýmist pakkað í 25kg poka eða 1000kg stórsekki eða skipað út sem lausavöru.

Þörungaverksmiðjan framleiðir lífrænt vottað hágæða þörungamjöl sem er í miklum metum víða um heim. Það er vottunarstofan Tún sem sér um vottunina fyrir íslenskan markað en QAI og OTCO votta samkvæmt N-Amerískum stöðlum. Afurðir verksmiðjunnar eru til mjög margvíslegra nota. Mjölið er notað sem fæðu- og fóðurbætiefni, sem áburður á gróður og í ýmsar húð- og snyrtivörur. Alginat er unnið úr mjölinu og fer það til enn fjölbreyttari nota í framleiðslu á matvælum, snyrtivörum, drykkjarvörum og til lyfjaframleiðslu.