Þörungaverksmiðjan leitast við að slá þang og þara í samræmi við vísindalegar niðurstöður um vaxtarhraða sjávargróðurs. Þang er slegið yfir vaxtarbroddi svipað og runnar eru klipptir. Reynsla og staðþekking sláttumanna, þekkt landamörk jarða og samvinna við bændur og aðra landeigendur í kringum Breiðafjörð er mikilvæg undirstaða við stjórnun á slætti og þangtekju.
Hafrannsóknastofnun mat heildarmang lífmassa klóþangs í Breiðafirði og gaf út ráðgjöf um aflamagn 2018. Innahúss hefur María Maack tekið saman skýrslur um meðafla með þang og þara frá 2016. Þannig er sýnt fram á að einkum á vorin má búast við sniglum í aflanum(<0,5%).
Þessa reynslu og hvernig uppskera hefur haldist jöfn og stöðug áratugum saman er grunnur að árlegri vottun um sjálfbæra uppskeru fyrir alþjóðlegan markað á vegum OTCO. Fulltrúar taka út starfsemina árlega og gefa út vottorð í samræmi við niðurstöðuna.
Karl Gunnarsson stundaði doktorsrannsóknir á stórþara í Breiðafirði upp úr 1975. Í ritgerð hans er því lýst að þari vaxi alla æfi frá stöngulenda. Næringin sest í stilkinn að vetri til og blaðkan endurnýjar sig frá stilkenda. Að jafnaði trosnar einnig ofan af hverri blöðku vöxtur fyrra árs. Þetta fer þó mikið eftir vaxtarskilyrðum, t.d hafróti og næringarforða í sjó. Gengið er út frá því að fjögurra ára gamall þari bæti ekki lengur við þunga sinn heldur slitni jafnmikið og hann vex.
Vottunarstofan Tún fylgir að jafnaði evrópskum stöðlum um lífræna vottun. Hún kemur árlega í eftirlit og kannar aðstæður innadyra og utan, framleiðsuferlið og umgengni við þörunga- auðlindina. Tún gefur út tvenns konar vottorð.
Þörungaverksmiðjan hefur haft lífræna vottun frá 1999 en endurnýja þarf vottun árlega í samræmi við niðurstöðu úttektar. Vottorðið er á ensku.
Quality Assurance International (QAI) tekur út starfsemi okkar fyrir alþjóðlegan markað. Þau fyrirtæki sem standast hina árlegu útttekt fá auðkennandi umhverfismerki sem þekkist á þeim markaði sem tekur við henni.
Ef vörur eru merktar USDA þá hefur QAI tekið vöruna út í farmleiðsluferlinu og dreifing hennar er vottuð fyrir Bandaríkjamarkað. Vottorðið er gefið út árlega í samræmi við þær kröfur sem gilda hverju sinni.
Enn fremur kemur úttektaraðili frá neytendavottun Gyðinga fyrir Kosher vottun. Er þá einkum átt við notkun á þangmjöli fyrir ræktun en ekki til manneldis.
